- Bilboko Udalaren ekoizpen artistikorako zentroak gaur, ekainak 24, arratsalde-gauera arte irekiko ditu ateak, eta BilbaoArten estudio-lagapenarekin proiektu artistikoak garatzeko Ekoizpenerako Laguntzen onuradun diren artista egoiliarrek ikasturte honetan egindako lana aurkeztuko du.
- URIBITARTE40 aretoan ireki berri den artista egoilarren erakusketa kolektiboa irailaren 6ra arte egongo da zabalik.
- 2026-2027 ikasturteko aurrerapen gisa, BilbaoArten artista egoilar berrien izenak jakinaraziko dira, baita URIBITARTE40 aretoan eta estatu mailako beste kultur zentro batzuetan bakarkako erakusketak egingo dituztenenak ere, sinatutako hitzarmen eta akordioei esker.
(Bilbon, 2026ko ekainaren 24an).- Bilboko alkate Juan Mari Aburtok, Kultura eta Gobernantzako zinegotzi Gonzalo Olabarriak, Administrazio Kontseiluko eta Udalbatzako ordezkariek eta BilbaoArteko zuzendariorde Helena López Camachok lagunduta, BilbaoArte Fundazioaren “Ate Irekiak 2026” azken jardunaldian parte hartu du gaur goizean.
Bilboko Udaleko ekoizpen artistikoko zentroak Urazurrutia kaleko 32. zenbakian duen egoitzako estudioetan biltdu ditu 12 artista egoiliarrek garatutako ekoizpenak, 2025-2026 ikasturtean estudio-lagapenarekin proiektu artistikoak egiteko laguntzen bidez. Lanak gaur, ekainak 24, gaueko 21:00ak arte egongo dira ikusgai.
Udal arte zentroko aretoetan hainbat adin eta jatorritako artista garaikideen proposamenak daude ikusgai: M. Benito Píriz (Panda), Manu Blázquez, Blanca Castro Ponce, Fátima Conesa, Juana García-Pozuelo, Auritz Iñurrieta Orbezua, Fermín Moreno Martín, Antoine Nessi, Gareth Phillips, Laurita Siles, Amaya Suberviola eta Fernando Villena.
Gaur goizeko bisitan, Bilboko Alkateak eta erakundeetako ordezkariek bertatik bertara ezagutu ahal izan dituzte artisten lan-prozesua eta azken ekoizpenak, eta zorionak eman dizkie egindako lanagatik. Gainera, azken hilabeteetan Bilbon egon direla gogorarazi du, beren lana garatzeko, hiria bizitzeko eta beren bizilekuko kideekin eta BilbaoArteko taldearekin esperientziak trukatzeko. “Gure hirian ia urtebete beste ikaskide batzuekin batera lanean egoteak aberastasuna ematen du zentzu guztietan, hala nola teknika berriak ikastea, ezagutzak finkatzea eta besteei transmititzea. Baina ez hori bakarrik; maila pertsonalean eta bizipenetan ere Bilbok arrastoa uzten die eta, horregatik, artista horietako askok gure Hiribildua bizilekutzat hartzen dute. Plazer bat da hainbeste talenturen erakarpen-gune izatea, baita talentu hori etorkizunean erakutsiko den leku guztietara zabaltzeko laguntzea ere”.
Halaber, Juan Mari Aburtok berretsi egin du “Bilboko ekoizpen artistikorako zentroak dakarren eredua mantentzeko eta indartzeko Udalaren konpromisoa, artisten prestakuntzan eta profesionalizazioan nazioarteko erreferente izaten jarrai dezan, bai eta Bilbok eta Euskadik kultura garaikidearen mapan duten posizionamenduan ere”.
Helena López Camacho BilbaoArteko zuzendariordeak eskertu du laguntza hori, eta artisten profesionalizazioaren garrantzia azpimarratu du, baita BilbaoArte bezalako produkzio-zentroetan helburu hori lortzeko jokatzen duten papera ere.
“Bilboko Udalaren, Eusko Jaurlaritzaren, Bizkaiko Foru Aldundiaren, Kultura Ministerioaren eta BBK Fundazioaren ekarpenei esker, errealitate bihur daitezke BilbaoArte Fundazioak garatutako beken, artisten eta nazioarteko erakundeen arteko trukeen, egoitzen eta sorkuntzarako laguntzen proiektuen oraina eta etorkizuna. Baliabide multzo honek mundu artistikoaren Europa mailako lehen lerroan kokatzen gaitu eta duela 27 urtetik sorkuntza garaikiderako erreferentziazko espazio gisa sendotzen gaitu “, azaldu du Helena López Camachok.
ATEAK ZABALIK URAZURRUTIAN, 32
BilboaArtek urtero antolatzen dituen Ateak Zabalik Jardunaldiak joan den astelehenean, ekainaren 22an, hasi eta gaur amaituko dira. Bisitariek aukera izan dute egun hauetan egileekin artelanei buruzko iritziak trukatzeko eta artisten iruzkinak jasotzeko. Lan horiek arte garaikidearen azken joeren, moduen eta lan-prozesuen erakusgarri dira.
BilbaoArteko zuzendariordearen arabera, “jardunaldiak erreferente dira Bilboko kultura-agendan; izan ere, urtero auzoko eta Bilbo osoko bizilagun asko erakartzen dituzte, baita komunitate artistikoko pertsonak ere. Luxu bat da artera hain gertu hurbildu ahal izatea”.
Ekimen hau artista egoiliarrek eta ekoizpenerako laguntzen onuradunek BilbaoArteko egoitzan egindako proiektuak ospatzeko eta aurkezteko jardunaldi gisa aurkezten da. Hamar hilabeteko lan gogorraren ondoren, artistek beren estudioak eta lanerako espazioak erakusketa-zentro gisa erakusten dituzte, eta haien praktikan interesa duten pertsona guztiekin hitz egiteko eta elkarreragiteko aukera ematen dute.
Jendaurreko aurkezpen ekitaldi honek, aldi berean, BilbaoArtek urtean zehar garatzen denari ikusgarritasuna emateko aukera ematen du. Instalazio eta artelan gisako ekoizpen materialak laguntzen dituzten teknika, prozesu eta baliabide tekniko eta pertsonalak. Baina baita artista egoiliarrek, beren instalazioak erabili dituztenek eta/edo ikastaro espezializatuetan eta programatutako jardueretan parte hartu dutenek bizitako esperientzietan ere.
ARTISTAK EGOITZAN 2025/26 ERAKUSKETA
Estudioen irekitzearekin batera, BilbaoArtek URIBITARTE40 aretoan erakusketa batekin itxiko du ikasturtea. Erakusketa irailaren 6ra arte egongo da zabalik, eta bertan azken artista egoilarren lanak bilduko dira.
Proiektu honetan, 2025-2026an ekoizpenerako laguntza jaso duten dozena bat artistak ekoitzitako lanak sartzen dira. Guztira, hogeita hamar bat lan ikusi ahal izango dira, BA Bildumaren parte izatera pasako direnak. Bildumak gaur egun 640 artelan biltzen ditu guztira.
Udan zehar, aretoak hainbat bisita gidatu eskainiko ditu euskaraz (uztailaren 8an eta abuztuaren 5ean) eta gaztelaniaz (uztailaren 22an eta irailaren 2an), aldi berean LSEn (Espainiako zeinu-mintzaira) egokituta, publiko orokorrarentzat
BILBAOARTEREN BALANTZEA 2025-2026
BilbaoArtek 2025-2026 aldian garatutako programazioak arte garaikidearen tokiko eta nazioarteko ekoizpen-, ikerketa-, prestakuntza- eta hedapen-gune nagusietako bat bihurtu du zentroa. Egoitza programak, sorkuntzarako laguntzak, erakusketak, jarduera publikoak, argitalpenak eta BA Bildumaren kudeaketa uztartuz, jarduera bizia eta askotarikoa egituratu ahal izan da, ehunka artista, milaka bisitari eta publiko-komunitate zabala biltzen dituena, BilbaoArteren papera indartuz hiribilduaren kultura-azpiegitura estrategiko gisa.
Aldi horretan lortutako emaitzek erakusten dute BilbaoArte sorkuntza garaikideko zentro integral gisa sendotu dela, artistei zuzeneko laguntza, ezagutza-ekoizpena, ondarearen kontserbazioa, programazio publikoa eta kultura-zabalkundea konbinatzeko gai dena.
Garatutako jardueraren handitasunak agerian uzten du zentroak Bilborentzat eta kultura-ekosistema garaikide osoarentzat kultura-, gizarte- eta arte-balioa sortzeko duen gaitasuna. Amaitzen ari den ikasturte honetan, BilbaoArtek bere osotasunean (Urazurrutia, URIBITARTE40 eta Otxarkoaga Open Gela egoitzak) 111 jarduera publiko hartu ditu, 6 erakusketa baino gehiago, programa publikoen eta erakusketen artean 6.000 bisitari baino gehiago, etengabe hazten ari den bilduma bat – oraingo honetan 24 lan batu dira – eta argitalpen-jarduera sendo bat, besteak beste erakusketen katalogoak eta ikastaroaren urtekaria, zaharberritzea eta funtsak kontserbatzea argitaratuz.
ARTISTEN KOMUNITATEA
Era berean, ekoizpen artistikoko zentroak 381 artistarekin lan egin du bere jarduera-ildoen bitartez, egoitza-programak, ekoizpenerako laguntzak, erakusketak, tailerrak, ikastaroak eta bitartekaritza-jarduerak barne. Egoitzen programak 20 artista hartu ditu, egoiliarren, gonbidatuen eta mugikortasun-programen onuradunen artean, ezagutzak trukatzea eta proiektu berriak sortzea errazten duen ikerketa- eta ekoizpen-gune bat sendotuz.
Aldi berean, arte-ekoizpeneko tailerrek erabilera handia izan dute arte-komunitatean: 156 erabiltzaile erregistratu dira, eta 4.534 lan-egun erabili dira tailerretan eta baliabideetan. Bereziki nabarmentzekoak dira Irudi digitala (1.178 artista), Grabatua (1.285), Eskultura (1.015) eta MediaLab (939) tailerrak, zentroan garatutako jarduera tekniko eta esperimentalaren zati handi bat biltzen baitute.
Horri guztiari gehitu behar zaizkio Otxarkoaga Open Gelako (12 artista eta proiektu) eta URIBITARTE40 aretoko (85 artista) jarduerak. Datu horiek BilbaoArtek ekoizpen artistiko garaikideari laguntzeko azpiegitura publiko gisa duen garrantzia islatzen dute, beste testuinguru batzuetan aurkitzen zailak diren baliabide espezializatuak eskaintzen baititu.
URIBITARTE40 aretoko erakusketa-programazioari eta BilbaoArteko egoitzetan garatutako programa publikoei esker, gainera, 85 artistak parte hartu dute 6 erakusketatan, 138 artistak 15 ikastaro espezializatutan, aurkezpenak eta proiektu publikoak (639 pertsona 15 ekintzatan, hala nola performance-etan, aurkezpenetan, topaketetan, etab.), eta nabarmen zabaldu da zentroak sustatutako jarduera artistikoaren irismena.
IKASTURTE BERRIAREN AURRERAPENA
Ekoizpenerako eta artisten profesionalizaziorako laguntzak jarraituko dira zentroaren lehentasunetako bat. Gaur, 2026-2027 ikasturterako hautatutako 11 artistak iragarri ditu BilbaoArtek: Karlos M. Bordoy, Jon Ibala, Estanis Comella, Izar Ocariz, Javier Ozcoidi, Víctor Rico, Javier Lozano, Celia Viada, Alazne Zubizarreta (modalitate orokorra), Itxaso Fernández (EHU modalitatea) eta Ismael Iglesias (Silver modalitatea).
Ikasturte honetako 11 egoilar artistetatik 5ek bakarkako erakusketak egingo dituzte Bilbon, Iruñean eta Salamancan, hiri horietako kultura-erakundeekin lortutako hitzarmenei esker. 2025-2026 ikasturtean URIBITARTE40 aretoan bakarkako erakusketa egingo duten hiru artista egoilarren izenak ere iragarri dira: Juana García-Pozuelo, Fátima Conesa eta Antoine Nessi.
Amaya Suberbiola, bestalde, Iruñeko Udaleko Kultura Departamentuak hautatutako sortzailea da, Zitadelan banakako erakusketa bat garatzeko. Era berean, 2026an zehar, Salamancako DA2 Arte Garaikideko Museoan erakusketa egingo duen artistaren izena jakinaraziko da.
