BilbaoArte Fundazioak Iruñeko Udalarekin lankidetza hasi du egile berrien arte garaikidea sustatzeko hitzarmen baten bidez

• Iruñeko Zitadelak 2026. urtearen amaieran, BilbaoArteren artista egoilarretako baten bakarkako erakusketa hartuko du.

Bilbaoarte Fundazioak eta Iruñeko Udalak lankidetza-hitzarmen bat sinatu dute sortzaile berrien sorkuntza artistiko garaikidea sustatzeko. Hitzarmenari esker, Iruñeko Zitadelan BilbaoArteko artista egoilar baten bakarkako erakusketa egin ahal izango da, eta lankidetza tekniko, logistiko eta ekonomikoko esparru bat ezarriko da, programa hori urteroko hitzordu gisa finkatzeko. Artistaren hautaketa egoitzako ikasturtean zehar egingo da, apirilean, artistak denbora materiala izan dezan erakusketaren esparruan erakutsiko den obrari forma emateko.

Hitzarmena Bilbon sinatu dute, astearte honetan, Iruñeko Kultura, Jai eta Kirol arloko zinegotzi Maider Beloki Unzuk eta BilbaoArte Fundazioko zuzendari Javier Riañok, udal ordezkaritza batek Bizkaiko hiriburura egindako bisitaren baitan, arte eremu ezberdinetako kultur erakundeen arteko sinergiak bilatzeko helburuarekin.

Hitzarmenak lau urteko iraupena izango du, eta aldeetako edozeinek urtero berrikusi ahal izango du. Udalak artista egoiliarra aukeratuko du, Nafarroaren mugakide diren eskualdeetarako lehentasuna izango dute eta Nafarroako lurraldearekin lan egiten duten artistei eta/edo proiektuei arreta berezia eskainiko die, nahiz eta beste jatorri eta ibilbide batzuetako artistak aukeratu ahal izango dituen. BilbaoArtek egileei eta haien obrei buruzko informazioa emango du, baita horien aurrerapenen jarraipena eta egoitzen bilakaera ere, irailetik uztailera bitartean.

BilbaoArtek, Ekoizpen Artistikoko Zentro gisa, 14.300 euroko zuzkidura ekonomikoa bideratuko du egoitzako 11 hilabeteetan, eta aldi baterako lagapen-estudio bat Fundazioaren egoitzan, bai eta zentroak bere ekoizpen-tailerretan dituen gainerako azpiegituretarako sarbidea ere. Era berean, etengabeko aholkularitza-zerbitzua eskaintzen du tailerretako arduradunen bitartez, ostatua (gastu arruntak barne) Fundazioaren pisu partekatuetan, BilbaoArtek antolatutako ikastaro eta tailerretarako doako sarbidea eta tarifa bereziak materialetan eta produkzio-prozesuetan.

Bestalde, Iruñeko Udalak erakusketa garatzeko baldintza egokiak bermatzen ditu, eta horien kudeaketa eta koordinazioa bere gain hartzen du. Datak Zitadelako Bolborategi eta/edo Labe aretoen urteko programazioaren arabera ezarriko dira; lehen proiektua 2026ko laugarren hiruhilekoan izango da. Udalak 4.000 euro jarriko ditu artista eta ekoizpenagatiko ordainsarietarako; 20.000 euro, gehienez, erakusketaren garraio, diseinu eta muntaketagatiko gastuetarako; eta 1.500 euro arte, erakusketaren hedapenagatiko gastuetarako, argitalpena barne.

Hitzarmenak udalaren hainbat helburu estrategikori erantzuten die: hiriaren kultura-bizitasuna sustatzea, sormena eta esperimentazio artistikoa sustatzea, erakundeen arteko lankidetza-sareak sortzea eta Iruñeak gaur egungo panoraman espazio aktibo gisa duen proiekzioa indartzea. BilbaoArte, Bilboko Udalaren mendeko erakundea, erreferentziazko ekoizpen artistikoko zentroetako bat da, sorkuntza garaikideari laguntzeko duen eredu finkatuagatik eta gorabidean dauden eta karrera ertainekoak diren artisten prestakuntzan, sustapenean eta laguntzan egindako ibilbide aintzatetsiagatik.

Hitzarmenak artistak profesionalizatzea eta lurraldeen arteko lankidetza bultzatzen du, eta, aldi berean, Zitadelako programazio artistikoa aberasten du, Iruñeko kultura garaikiderako erreferentziazko gunea baita.