Doña Casilda (2009)
Olioa ohol gainean
40 x 40 cm
BA Bilduma
Erregistro Zk.: 2009.183.1
Doña Casilda lana 2009 eta 2010 artean egindako 40×40 cm-ko hamar margolaneko serie baten parte da. Seriea funtsezko bi ardatzen inguruan egituratzen da: irudikatutako gaia eta pieza bakoitzaren esplorazio plastikoa.
Margolan horiek artistaren eguneroko inguruneetan oinarritutako bilaketa-etapa bati erantzuten diote. Horiek guztiak ohiko agertokietan ateratako argazkietatik abiatzen dira: Bilboko hiri-paisaiak, Leioako Arte Ederren Fakultatearen eta hiriaren arteko ibilbidean bildutako ikuspegiak, kaleak, parkeak, zuhaitzak eta espaloiak. Kasu zehatz honetan, Doña Casildaren inspirazioa 2009ko udaberrian Bilboko izen bereko parkean ateratako argazki bat da. Irudian, emakume bat ikusten da, ahoz gora belar gainean, bikinian eguzkia hartzen. Margolanean, argiak paper protagonista bat hartzen du: kolorearen, kontrastearen eta saturazioaren estudioa da, baina baita urtearen ziklo berri baten hasieraren, beroaren itzuleraren eta eguraldi onaren ebokazioa ere. Konposizioa eta ikuspuntua argazki ugariren artean aukeratu ziren, haien potentzial piktorikoaren arabera.
Bigarren ardatzak ere, alegia, plastikaren erabilerak, seriea definitzen du. Lan hauek esperimentazio-etapa batekoak dira, eta gaiak pinturaren hizkuntza zabaltzeko abiapuntu gisa balio du. Bere formazioaren une goiztiar horretan —doktoregoa hasi zuen— artistak pintura jolasteko eta probatzeko espazio modua ikusten zuen: fluor koloreak, gardentasunak, hondo hutsak, konposizio arroztuak, pintzelkada solteak eta figurazio bakuna konbinatzen zituen piezaren esperientzia eraikitzeko.
Iker Serrano Robles (Iruñea, 1982) Arte Ederren doktorea da. Bere lanaren bitartez, hausnarketa egin du artearen hizkuntzaz, pinturaren testuinguruaz eta honek ikuslearekin eta artistarekin berarekin duen harremanaz. Era horretan, pintura artelanaren gai bihurtzen da, jolas sinboliko sotil batean, narratiba piktorikoaren bitartez aurkeztuta. Bere obra erakunde hauetan erakutsi du, beste batzuen artean: Utopia Parkway Galeria (Madril), Nafarroako Museoa (Iruñea), Artium Museoa (Vitoria-Gasteiz) edo La Casa Encencidad (Madril), beste batzuen artean.