Rama y metal [Adarra eta metala] (2024)
Eskultura. Sasi-adarra eta altzairu herdoilgaitza
157 x 0,5 x 33 cm
BA Bilduma
Erregistro Zk.: 2024.597.1
Fiedlerrek metafora-iturri handi bat aurkitzen du naturaren izaera ulergaitzean eta beraren irudikapen-moduetan, eta bere praktikara eramaten ditu metafora horiek. Zeharkatzea, behatzea, biltzea eta aztertzea gorputza eta testuingurua uztartzen dituen lan-prozesu baten osagaiak dira. Artistak elementu naturalak bereganatu eta integratzen ditu bere obran, pintura, bideo, argazki eta instalazioen bidez manipulatuz eta bideratuz. Fiedlerrek bildu egiten ditu, euren jatorria kentzen zaienean hartzen duten izaera arrotza eta partikularrak erakarrita, hau da, gorputz handiago batetik erauzten direnean, gorputz horren zati izateari utzita. Euren jatorritik isolatutako elementu horiek dimentsio bizidun bat ekartzen diote gogora artistari, presentzia magnetiko eta limurtzaile bat, eta horregatik kontuz hartzen ditu eta samurtasunez biltzen ditu, haien pisua eta hauskortasuna tailerrera eramanez.
Elementu horietarako leku berri bat aurkitzeko ariketa etengabearen bitartez, elementu horiek elkartuz, giza irudiak, animaliak, landareak edo beste organismo batzuk gogora ekartzen dituzten forma hibridoak itxuratzen dira. Mugak lausotu egiten dira, eta elementuen ezaugarri fisiko, antropomorfiko eta semantikoetatik sortzen diren intersekzio berriei irekitzen diete bidea, organismoen eta ekosistemen artean dagoen interdependentziari erreferentzia eginez.
Anatomia eta Adarra eta metala lan-prozesu horren adibidetzat har daitezke. Horietako lehenengoan, beso bat gorputz begetal baten erditik sartzen da. Interakzio horren bitartez, aldaketa sakon bat gertatzen da bi elementuen egituran eta jatorrizko forman, alde gizatiarra eta alde begetala difuminatuta dituen gorputz berri bat sortuz. Bigarren obran, adar bat altzairu herdoilgaitzezko hagatxoetan sartzen da, itxuraz gorputz bakarra izango balitz bezala integratuz. Adarraren okerdurak elementu bizidun bat dakar gogora (animalia bat, edo ibai bat), eta sentsazio hori areagotu egiten da metalaren zurruntasunarekin duen kontrasteagatik.