«Ez dago errautsik gabeko suterik», Urtzi Ibarguen

2024ko urtarrilaren 13tik 28ra, Oxford aretoak (Zumaia) Urtzi Ibarguen artistaren Ez dago errautsik gabeko suterik erakusketa eskainiko du. Fundazioaren beka jaso zuen 2012an eta 2016an; azken honen bidez, bakarkako erakusketa bat izan zuen 2017an BilbaoArten. Gainera, 2019, 2021 eta 2023an Laguntzen programan parte hartu zuen.

Ez dago errautsik gabeko suterik, 2016 eta 2017 artean BilbaoArte Fundazioan garatu eta aurkeztutako proiektuari jarraipena ematen dio. Abiapuntu berari jarraituz, forma berrietarantz eboluzio bat planteatzen du, oraingoan arkitekturan zentratzen direnak, tenpluari lotutako ekintza-eremu bat, eta, era berean, fedeari eta sinesmenei lotutakoa.