BilbaoArtek GAU ZURIA 2025 erakusketan parte hartuko du Abigail Lazkoz (Bilbo, 1972) artistaren La pintora (2025) instalazioarekin, URIBITARTE40 aretoan. Instalazioa aretoko beirateetako baterako berariaz pentsatuta dago, eta GAU ZURIArako ad hoc pentsatuta. Espazioaren kanpoaldetik ekainaren 13an eta 14an egongo da ikusgai.
La pintora (2025) marrazki hedatua da, artistaren irudia eta bere lana ulertzen laguntzeko helburua duena, eta, aldi berean, BilbaoArte bezalako ekoizpen artistikoko zentroek garatzen duten lanarekin lotzen da, artistei denbora, espazioa eta baliabideak emanez, trebatzen jarraitu eta beren ibilbide profesionaletan aurrera egin dezaten.
Instalazioa Aretoko beirateetako baterako pentsatuta dago berariaz, eta artistak gizarte garaikidean “multitasker” gisa duen irudiari buruz hausnartzen duen ilustrazioa da. Termino hori informatikaren esparruan sortu zen, hainbat eragiketa aldi berean egiten dituzten sistemak deskribatzeko, eta giza testuingurura eraman da, pertsona balioaniztunak, moldagarriak eta ingurune dinamikoetan askotariko eskaerak maneiatzeko gaitasuna dutenak aipatzeko. Hori gertatzen da gizarte garaikidean artistekin; izan ere, sorkuntza artistikoa ez da haien zeregin bakarra, baizik eta sormen-ekoizpenetik hasi eta kudeaketa, sustapena eta merkatuaren dinamiketara egokitzea barne hartzen dituzten rol ugari beren gain hartu behar dituzten profesionalak dira.
Gainera, BilbaoArteren egoitza nagusian Urazurrutia kaleko 32. zenbakian dagoena, atzeko fatxadan (Iturburu kalea) Abilgail Lazkozek 2002an egindako Dancer obraren erreprodukzio bat dago, kaletik etengabe ikus daitekeena. Artistak garai horretan garatu zituen pintura eta marrazki hedatuaren 0 graduaren inguruko ikerketen lan bereizgarria da.
ABILGAIL LAZKOZ
Bilbao, 1972
2000. urtean BilbaoArten artista egoilarra izan zen, eta orduz geroztik erakundearekin lotura izaten jarraitu du. Marrazki hedatuan duen ikuspegi berritzaileagatik ezaguna da, erakusketa-espazioetara egokitzen diren muralak eta instalazioak sortuz eta ikuslea obrarekin elkarreraginean aritzera gonbidatuz. Arte Ederretan lizentziatua eta Euskal Herriko Unibertsitatean (UPV/EHU) doktorea, pinturan espezializatua; ondoren Erresuma Batuko Winchester School of Art-en egin zituen ikasketak. Lazkozen lana hainbat bilduma nabarmenetan dago, hala nola Guggenheim Bilbao Museoan; ARTIUM Arte Garaikideko Euskal Zentro-Museoan, Vitoria-Gasteizen; MUSAC, Gaztela eta Leongo Arte Garaikideko Museoan; CAB, Caja de Burgos Arte Zentroan; Banco Santander Fundazioan, Madrilen edo Queens Museum of Arten, New Yorken.