Fundación BilbaoArte Fundazioak bat egingo du, aurten ere, Gau Zuria-Gau Zuriarekin, Beatriz Sánchez artistaren “LOW-Escena” instalazioarekin.
URIBITARTE40en ikusi ahal izango da ekainaren 19an eta 20an.
Artistak hainbat artefaktu mugikor eta eskultura txiki izango ditu, eguneroko objektuak, zeramikak eta aurkitutako zatiak astintzen dituzten motorren bidez aktibatuta. Instalazioak sistema mekaniko prekarioak, proiekzioak eta argi-jokoak konbinatzen ditu, espazioa ilusio optikoko trikimailuetan eta jostailu-azoketan inspiratutako eszenografia mugikor moduko bat bihurtuz. Etxekoaren eta fantasmagorikoaren artean, hondakin txikiek bizitza hartzen dute automaten antzera.
Kordoban jaioa, Beatriz Sánchez artista bisuala da, EHUn Arte Ederretan lizentziaduna eta Pompeu Fabra Unibertsitatean Arte Digitaletan Masterra egina.
Bere lanak marrazkia, collagea, mihiztadura eta bideosormen-formatu desberdinak uztartzen ditu, esperimentazioak, umoreak eta artifizioak zeharkatutako irudi-formak aztertuz. Zinemaurreko mekanismoek — fantasmagoriak, trikimailu optikoak edo ikusmen-makinak — eta irudi digitalen zirkulazio garaikideak eraginda, bere proiektuek gif, loop, meme edo “irudi pobrearen” berezko dinamikak testuinguru fisiko, eszeniko eta ikus-entzunezkoetara eramaten dituzte.
Gaur egun Bilbon bizi da, eta bertan bere lan artistikoaren ekoizpena bideoklipen errealizazioarekin eta zuzeneko ikus-entzunezko emanaldiekin konbinatzen du. Bideogintzako eta ikus-entzunezko esperimentazioko tailerrak ere egiten ditu jaialdietan, unibertsitateetan eta arte-zentroetan.
INFORMAZIOA
Proiektuaren izena: LOW-Escena
Artista: Beatriz Sánchez
Data: Ekainak 19 (ostirala) eta 20 (larunbata)
Ordutegia: 19:30etatik 00:30etara