Louka Butzbach (Fontenay-sous-Bois, 1995) komikigilea Marseillan bizi da. Mikroedizioaren arloan lehen urratsak egin ondoren, lehen liburua eman zuen argitara, “La Constituante” (Éditions Matière, 2023), Frantziako Iraultzan izandako komiki-tailer bati buruzko istorio anakronikoa. Bere komikiak ipuinaren, alegiaren, antzerkiaren eta ametsaren arteko erdibidean daude, pertsonaia gazte, androgino eta malenkoniatsuak dituzte protagonista, eta behar diren espazioa eta denbora eskaintzen dizkiete askatasuna grinaz bilatzeko. Lagon, Colorama Clubhouse eta Strapazin aldizkarietan kolaboratu du, besteak beste, eta ilustrazioa eta pintura jorratzen ditu. Proiektu kolektiboetan parte hartzen du aldizka, hala nola “Cheezy Dream” (2024) web-seriean eta “Exposissimo” (2021-2023) erakusketa-seriean.
Komikiaren Nazioarteko Egoitza Azkuna Zentroaren, Cité Internationale de la Bande Dessinée et de L ‘image (Angoûleme) eta La Maison De La Litterature (Quebec) erakundeen eta BilbaoArteren babesaren artean sustatutako esperientzia gurutzatua da. Ekimenak sorkuntza sustatzen du komikiaren eremuan, eta hainbat herrialdetako pertsonen arteko topaketa bultzatzen du, nobela grafikoaren funtsezko ingurune profesionaletan, egoiliarrak beste diziplina garaikide artistiko batzuetako artistekin konektatuz.
Egoitzako emaitzak Running on empty erakusketan ikusi ahal izango dira. Comics as visual poetry, Azkuna Zentroa-Alhóndiga Bilbaoko Mediatekako espazioan, 2026ko martxoaren 17tik aurrera, komiki eta tebeoren egunarekin bat eginez.
@loukabutzbach