Urriaren 15ean, osteguna, 19:00etan, BilbaoArteko URIBITARTE40 Aretoan Shippeo ekitaldia egingo da, M. Benito Pírizen «Izar iheskorra eta bihotza» erakusketa aldatzeko.
Erakusketa egun batez aldatuko da Jone Elorriagarekin batera
SHIPPEO, M. Benito Pirizen Izar iheskorra eta bihotza erakusketaren barruan egun bakar batean formalizatuko den esku-hartzea da. Jone Elorriaga artistak pieza puzgarriak sortu ditu erakusketa osatzen duten piezentzat, espazioan dagoeneko ikusgai dauden artelanetako bat, horietan eraldaketa bat sortzeko.
Shippeo terminoa ingelesezko shipping-etik dator, relationship-etik (harremana) eratorria, Interneteko kulturari dagokion termino bat, eta bi pertsonak maitasun-harreman bat ezartzeko nahia adierazteko erabiltzen da, baita harreman hori ez dagoenean ere. Shippear-ek lotura bat imajinatzea eta bi gorputzen gainean proiektatzea inplikatzen du, banandutako gizabanako gisa hautemateari utzi eta bikote bihurtzeko aukera.
SHIPPEOn ez da piezen arteko elkarrizketa planteatzen, ezta desberdintasunak agerian uztea ere, mimetizazio-prozesu bat baizik. Pieza berri horiek lehendik dagoenaren antza hartu eta egokitu nahi dute, mugen arteko nahasmena sortzeko asmoz.
Esku-hartzea bi izateari utzi eta bat izateko ideiatik abiatzen da. Puzgarriak M. Benito Pírizen piezetan jarri, sartu edo bermatzen dira, eta forma, kolore, bolumen eta keinuak hartzen dituzte.
Mimetizazioa ingurunera edo beste batzuetara egokitzeko gaitasuna da, itxurarekin, koloreekin edo oharkabean pasatzeko, integratzeko edo bizirauteko portaerekin. SHIPPEOn ere desira modu bat bihurtzen da, bestearen antza izatea harengana hurbiltzeko, harekin nahastea bata non amaitzen den eta bestea non hasten den ez bereizteko.
Sarrera doan.
Izar iheskorra eta bihotza bultzada- eta euste-indarren inguruko ikerketa baten izenburua eta emaitza da. Benitok gorputza kanporantz proiektatzen duen indar iheskor gisa ulertzen du bultzada, aldaketari, topaketari eta konfrontazioari irekia. Izar iheskor baten gisara bat-batean agertu, eta gorputza nekatzean edo emozioa baretzean desagertzen den bulkada. Eusteak, aldiz, barrurantz egiten du lan: erregulatu, eutsi eta xurgatu egiten du, irmotasunez eta bihotzez babesten den hori mantendu eta zaintzeko ahaleginean.
Gauzak —bihotzez— egiteak sentiberatasunaren aldeko hautua egitea eta emozioari mugimenduaren parte izaten uztea dakar; bultzada izateak, berriz, eraldatzeko, mugitzeko eta nork bere burua eraikitzen jarraitzeko behar den espazioa zabaltzen du. M. Benitok abiapuntutzat hartzen duen irudia, izatez, hibrido bat da: aldi berean agerian jarri eta bere baitan biltzen den bihotz iheskor bat. Elkarren aurkako kontzeptuak baino gehiago, bultzadak eta eusteak etengabe eraldatzen ari den identitate baten eraikuntzan esku hartzen dute. Era berean, erakusketa osatzen duten piezak bulkadaren eta babesaren, agerian jartzearen eta aterpearen, oldarkortasunaren eta afektuaren arteko etengabeko negoziazioan taxutzen dira.
JONE ELORRIAGA SOTO
Artean graduatua EHUn Leioan 2016. 2026an Vitoria-Gasteizko Montehermoso Kulturunean bakarkako erakusketa egin du, “ALDI HORIETAN GUZTIETAN” proiektuarekin; Ertibil erakusketa ibiltariaren hirugarren saria jaso du. Bizkaia eta Mallorkako Alaro elektrizitate dorrean, eta Bilboko Guggenheim-eko auditorioan ere esku hartu du, “Bihar Pentsatu” proiektuaren barruan. Aurretik, bere puzgarriak erakutsi ditu hainbat proiektutan, hala nola “Lanean”, Bilboko Errekalde Aretoan burutu zuena, obretako aretoko zutabeetan parte hartuz; eta Las Cigarreras Kultur Etxean, Alacanten, Umbral erakusketa kolektiboaren barruan.
Bilboko bakarkako erakusketen artean, Dpto eta La Taller Galerian egindakoa nabarmentzen da, “HINCHA2: gorria eta arrosa” izenburupean. Arte plastikoetako bekak jaso ditu, adibidez: Eusko Jaurlaritza, Bizkaiko Foru Aldundia birritan eta Durangoko Astarloa Kulturgintzako sorkuntza-beka, Durangoko Arte eta Historia Museoan bakarkako erakusketa duena.
M. BENITO PÍRIZ
Durango, 1992
Bilbon bizi eta lan egiten du.
BilbaoArteko artista egoiliarra, 2024-2026 aldian
Benito Píriz Arte Ederretan graduatu zen EHUn (2014), eta Arte Ikerketa eta Sorkuntzako masterra egin zuen 2015ean. Bakarkako erakusketak egin ditu Montehermoso Kultur Zentroan, “Travieso” erakusketarekin, eta Rekalde Aretoan, “Pikete-tuning” erakusketarekin; baita BilbaoArten, RKE-n eta Arizko Dorrean ere. Talde-erakusketetan, berriz, Bilboko Guggenheim Museoan, Horcasitas Jauregian eta Máa (Bilbo), Artnueve (Murtzia) eta La Bibi + Reus City (Palma) galerietan parte hartu du. Getxoarten lehen saria, Ertibilen bigarren saria eta Errioxako Arte Gaztearen Erakusketan hirugarren saria jaso ditu. Bere egonaldi artistikoen artean nabarmentzekoak dira Azkuna Zentroko Babestu programa eta BilbaoArteko bi urteko egonaldia.